சில்க் ரோடு பகுதி -2- USE OF BITCOIN TOR IN SILKROAD

பிட்காயின் சட்ட விரோதமான செயலுக்கு மட்டுமல்ல, நல்ல விஷயங்களுக்கும் பயன்படுத்தப்பட்டதால், 2010ல் ஆரம்பித்த பிட்காயின், வெகு விரைவாக மக்கள் மத்தியில் பரவியது. யாரும் யாருக்கும் பணம் அனுப்பலாம். அரசாங்கத்தால், ட்ராக் செய்ய முடியாது. வலைத்தளங்களில் போதை பொருட்களை வாங்கும் நபர்கள், தங்களின் அடையாளங்களை மறைத்து, பணம் செலுத்த பிட்காயின் தான் சரியானது என்று தேர்ந்தெடுத்தான், ரோஸ். ஒருவழியாக, அனைத்து தடைகளும் விலக ஜனவரி 2011ல் தனது வலைத்தளத்தை அமோகமாக வெளியுலகத்திற்கு அறிமுகம் செய்தான்.

(இந்த பதிவை புரிந்துக்கொள்ள, தொடரின் முந்தைய பகுதி-1 யை இந்த லிங்கில் வாசிக்கவும்)

இன்டெர்நெட்ல இருக்குற 5-10% வெப்சைட் மட்டும் தான் google ல தேடி கண்டுபிடிக்க முடியும். மீதி வெப்சைட்கள் சாதாரணமா தேடினால் கிடைக்காது. இப்படி மறைமுகமாக இயங்கும் பல வெப்சைட், போதை பொருட்கள் விற்பனை, ஆயுத கடத்தல், தீவிரவாத செயல்கள் என்று இயங்கி கொண்டிருக்கிறது. தன்னை பற்றிய அடையாளம், தான் செய்யும் செயல்கள், வெளியுலகிற்கு தெரியாமல் இருக்க பயன்படும் வெப்சைட்களும் இதில் அடங்கும். அரசாங்கத்தால் இந்த வெப்சைட்டுகளை முடிக்க முடிவதில்லை. அதற்காக. எல்லா வெப்சைட்டுகளும் கெட்ட காரியங்களுக்கு பயன்படுபவை அல்ல. பெரும்பாலான “நல்லவர்களும்” இதை பயன்படுத்துகிறார்கள். உதாரணத்திற்கு ஊடகவியலாளர்கள் அரசாங்கத்தை பற்றிய சில ரகசிய விஷயங்களை சொல்வதற்கும், செல்போன்களை ஒட்டுகேட்கும் அரசாங்கத்தை வெளிச்சம்போட்டு காட்டவும், காம கொடூரர்களாக வலம் வரும் பெரும்புள்ளிகளை உலகிற்கு அடையாளம் காட்டவும் பயன்படுத்துகிறார்கள். இந்த வகை வெப்சைட்டுகளை இருள்வலை என்று அழைக்கிறார்கள். இந்த வெப்சைட்டுகளை நாம் சாதாரணமாக கேள்விபட்டிருக்கும் .COM, .NET, .ORG போல அல்லாமல் .ONION என்று முடியும். மேலும், MARUDHAANI.COM போல எளிதாக நினைவில் கொள்ள முடியாது. ஆங்கில எழுத்துக்களால் ஆன கோர்வையாக இருக்கும். உதாரணத்திற்கு, http://3g2upl4pq6kufc4m.onion/, இது கூகுள் மாதிரி ஒரு செர்ச் இஞ்சின். பார்த்தா அப்படி தெரியலலா? ஏதோ குழந்தை கீ போர்டுல விளையாண்ட மாதிரி இருக்குல?. மேலும், .ONION, டோர் ப்ரௌசெரில் மட்டும் தான் வேலை செய்யும். சாதாரண ப்ரௌசெரில் வேலை செய்யாது.

சாதாரண வெப்சைட் போல சில்க் ரோடை பயன்படுத்துவது அவ்வளவு எளிதல்ல. எனவே அதை பயன்படுத்தும்  முறை, போதைப்பொருள் வாங்கும் முறை மற்றும் பிட்காயினை பயன்படுத்தும் முறையை, தனது வலைத்தளத்தில் செயல் விளக்கமாக கொடுத்திருந்தான் ரோஸ்,. SILKROAD.COM என்று டைப் செய்தால் மட்டும் சில்க் ரோடிற்கு போக முடியாது. ஏற்கனவே பார்த்தது போல, அதற்கென்று டோர் நெட்வொர்க்கில் சில்க் ரோடின் முகவரி “silkroadvb5piz3r.onion” என்று இருக்கும். தினம் தோறும் பயன்படுத்தும் வலைத்தள முகவரி போல இல்லாததால், இந்த ,onion  முகவரியை எப்படியாவது வெளியுலகத்திற்கு தெரியப்படுத்த ரோஸ் விரும்பினான். இதற்காக மேஜிக் மஷ்ரூம் பற்றிய விவரங்கள் அடங்கிய இரண்டு BLOGகுகளில், சில்க் ரோடு என்று ஒன்று இருப்பதாகவும், அதை தான் பார்த்தாகவும், விருப்பம் உள்ளவர்கள் அங்கு சென்று பாருங்கள் என்று விளம்பரப்படுத்தியிருந்தான்.

ஆரம்பமானது சில்க் ரோட். அறுவடையானது மேஜிக் மஷ்ரூம்.

காதலிக்காக வழி மேல் விழி வைத்துக் காத்திருக்கும் காதலன் போல, வலைத்தளத்தை திறந்து வைத்து தனது முதல் வாடிக்கையாளருக்காக காத்திருந்தான், ரோஸ். சில மணி நேரங்கள் கடந்து முதல் ஆர்டர் வந்தது. ரோஸை கையில் பிடிக்க முடியவில்லை. ரோஸிற்கு ஒரே கொண்டாட்டம். ஏற்கனவே ஆன்லைனில், புத்தக விற்பனை செய்த அனுபவம் இருந்ததால், தனக்கு வந்த முதல் மேஜிக் மஷ்ரூம் ஆர்டரை அழகான பார்சலில் வெற்றிகரமாக அனுப்பினான்.

மாதங்கள் கடந்தன. ஆர்டரை எதிர்நோக்கி எதிர்பார்த்திருந்த காலங்கள் போய், குவிந்த ஆர்டர்களை அனுப்ப நேரம் இல்லாமல் தவித்தான், ரோஸ். இடைப்பட்ட காலத்தில், மேஜிக் மஷ்ரூமையும் தாண்டி புதிய போதைப் பொருட்களான கஞ்சா, ஹெராயின், போதை மாத்திரைகளை விற்க, பல விற்பனயாளர்கள் ரோஸுடன் கைகோர்த்தனர்.

வாங்குவது போதை பொருள் என்பதால், தெரியாத விற்பனையாளர்களிடம், தங்கள் வீட்டு முகவரியை கொடுக்க வாடிக்கையாளர்கள் தயங்கினர். இதனால், அமேஸான், ஈபே போல சில்க் ரோடிலும், ரேட்டிங் சிஸ்டத்தை ரோஸ் அறிமுகம் செய்தான். விற்பனையாளர்கள் தங்கள் ரேட்டிங்கை அதிகரிக்க போலி இல்லாத போதை பொருட்களை கொடுக்க ஆரம்பித்தனர். வியாபாரம் சூடு பிடித்தது. ரோஸ் பலருடன் சேர்ந்து தொழில் செய்வதை அறிந்த ஜூலியா முதன்முறையாக, அச்சமடைந்தாள். ரோஸை எச்சரித்தாள். ஆனால், ரோஸோ ஜூலியாவை கண்டு கொள்ளவில்லை.

கம்ப்யூட்டர் ப்ரோகிராமிங் அனுபவமில்லாமல் வலைத்தளத்தை வடிவமைத்ததால், அடிக்கடி அதன் இயக்கத்தில் பிரச்சினை வந்தது. இதனால், தன் கல்லூரி நண்பன் ரிச்சர்டின் உதவியை நாடினான், ரோஸ். மிக ரகசியமாக குறுகிய வட்டத்தில் வைத்துக் கொள்ள நினைத்த ரோஸ், தனது காதலிக்கு அடுத்து, முதன்முறையாக ரகசிய சாம்ராஜ்யத்தை மூன்றாவது நபருக்கு தெரியப்படுத்தினான். பிரச்சினை எல்லாம் முடிந்து சுமூகமாக சென்று கொண்டிருந்த வேளையில், ரோஸிற்கு அடுத்து ஒரு அதிர்ச்சி தரும் செய்தி காத்திருந்தது.

ADRIAN CHEN, பிளாக் எழுதுவதில் பிரபலமான ஓர் இளைஞன், சில்க் ரோடை மோப்பம் பிடித்தான். சில வாரங்கள் சில்க் ரோடை பின்தொடர்ந்த சென், அதைப் பற்றிய விரிவான கட்டுரை ஒன்றை வெளியிட்டான். அமெரிக்காவின் நாடாளுமன்றமே அதைப் பார்த்து அதிர்ந்தது. எதிர்க்கட்சியின் அழுத்தத்தால் செய்தியாளர்களை சந்தித்தார் உள்துறை அமைச்சர். பல பக்கங்கள் சில்க் ரோடை பற்றிய ப்ரின்ட் அவுட் உடன் அவர் கொடுத்த பேட்டி, தொலைக்காட்சியில் பெரிதாக விவாதிக்கப்பட்டது. அதனை தொடர்ந்து, பார்க்கும் இடமெல்லாம், சில்க் ரோடை பற்றிய செய்திகளும் கட்டுரைகளும் குவிந்தன. ரோஸ் செய்வதறியாமல் திகைத்து நின்றான். இருந்தும் தனது வலைத்தளத்தின் பாதுகாப்பு அம்சத்தை அதிகரிக்க நினைத்தானே தவிர, ஒரு போதும் மூட நினைத்ததில்லை. வலைத்தளத்தை கண்டுபிடிக்கலாம் ஆனால், உரிமையாளர் யார் என்பதை கண்டுபிடிக்கவே முடியாது என்று தைரியமாக இருந்தான் ரோஸ்.

சில்க் ரோடின் உரிமையாளரை பிடிக்க, அமெரிக்க அரசாங்கம் பல விசாரணை குழுக்களை நியமித்து, அதே சமயம், அந்த வலைத்தளத்தை முடக்க ஆணையும் பிறப்பித்தது. எஃப்பிஐ, லோக்கல் போலீஸ், போதை தடுப்பு, சைபர் க்ரைம், வருமானத்துறை என்று பல குழுக்கள் களத்தில் குதித்தன. இந்தக் குழுக்களில் சில அதிகாரிகள் ஏற்கனவே பல ஹாக்கர்ஸ் கூட்டத்தை கைது செய்த அனுபவம் கொண்டவர்களாக இருந்தனர். 

கண்டிப்பாக அரசாங்கம், சில்க் ரோடை கண்டுபிடிக்க முயற்சி செய்யும் என்பதால், தனது வலைத்தளத்தின் பாதுகாப்பை மீண்டும் அதிகரிக்க நினைத்தான், ரோஸ். தனக்கு அனுபவம் குறைவாக இருந்ததால் வேலைக்கு ஆட்களை நியமித்தான் (நம்ம ஊர் ஆபிஸ் வேலைக்கு போயிட்டு வர்ற மாதிரி இல்லாம, இங்க வேலை பாக்குறவங்க யாரும், யாரோட முகத்தையும் பார்த்ததில்ல)

அரசாங்கத்தின் பிடியிலிருந்து தப்பிக்க மட்டுமே நினைத்து கொண்டிருந்த ரோஸிற்கு, பிரச்சினை வேறு ரூபத்திலிருந்து வந்தது. வெளியுலகத்தில் சில்க் ரோட் பிரபலமானதால், வலைத்தளத்தை ஹாக்கர்ஸ் தாக்க தொடங்கினர். பலமுறை வலைத்தளத்தை முடக்கி, பணயப்பணம் கொடுத்த பின்னரே, வலைத்தளத்தை செயல்பட அனுமதித்தனர். காவல் துறையின் பயத்தை விட ஹாக்கர்ஸின் பயம் அதிகரிக்க தொடங்கியது. இந்த  காலகட்டத்தில், புதியதாக மற்றொரு நண்பன் அறிமுகமாகினான். அவனது பெயர் வெரைட்டி ஜோன்ஸ்.

தொடரும்……………………………………


"விடாமல் உழைக்கும் மருத்துவர்கள், செவிலியர்கள், அரசு அதிகாரிகள் மற்றும் கொரோனாவை தடுக்க உதவும் நாட்டின் ஒவ்வொரு குடிமக்களுக்கும் என் பணிவான நன்றி" - மருதாணி.